| یا ئاشکهرایه کو ژن ئهڤرو شیایه ههتا راددهکێ خو ل هندهك داب و نهریتێن پاشکهفتی قورتال بکهت ، ئهڤ پشکداریه چ وهك پێتڤیهکا ڤی سهردهمی بیت ، یان ژی پێتڤیه کا مادی بیت ، رهوشا ژیانا ئهڤرو وهکریه کو ژن ژ چارچوڤێ کارێن دناڤ مالێ دهرکهڤیت و دهرڤهی مالێ کار بکهت ، ئهڤرو ژن دههمی بورادا کار دکهت ، مهرهما من ژڤی بابهتی وهك ههڤیا ژن و مێرانه و یاسا و مافان دا ، کو پێتڤی یه ئهڤ وهك ههڤیه دبوارێ سیاسی ژی دا ههبیت و ژن یا پشکداربیت دکارێ سیاسی دا و وهرگرتنا بریارێ دا ههلبهت جێ بهجێ کرنا ڤێ پرنسیپێ ب تنێ ب دهرئێخستنا یان تومارکرنا هندهك دهقێن یاسایی و رێککهفتن و راگههاندن و به یانامێن نیڤ دهولهتی دا ، یان دهست نیشان کرنا وان دیاسایا نافخویی دا ب جهناهێت ، ژبهرکو کومهکا رهوشت و یاسایێن جڤاکی د چڤاکێ مروڤایهتی یێ دا ب درێژاهیا دیروکێ جهێ خوکریه و ژن ب پلا دووێ دانایه و سهرههلدانا سیستهمێ باب سالاریێ ژی ئهگهر بویه بوڤێ جهندێ !
لهوما جێ بهجێ کرنا هزرا وهك ههڤیا ژن و مێرا دمافان دا ژبلی مافێن سیاسی ژی یا پێتڤی ب دهستنیشان کرنا میکانزمهکا گونجای ههیه داکو دهلیڤا جڤاکی بو ژنێ ههبیت دابشێت پشکداریێ دکارێ سیاسی دا بکهت و پلێت بلند ب دهستخوڤه بینیت ، بوڤێ چهندێ ژی پێتڤیه ئێکهم جار داب و نهریت و یاسایێن کهڤنه پهرست و پاشکهفتی یێن جڤاکی بهێنه گوهرین ، کو ئهڤ داب و نهریته ههمی گونههێن مروڤایهتیێ و نهخوشیا و بێ وهغهریێ دئێخنه دستویێ ژنێ دا و دهێته هزرکرن کو ژنا بهرپرسیاره ژههمی نهخوشی و کارهساتێن ژبو خێزانێ و جڤاکێ و ههتا وهلاتی جێ دین ..! و ئهڤ هزره دگهلهك جڤاکا دا یا بهر بهلاڤبویه و ههتا نوکه ژی دهندهك جڤاکا دا مایه ، وهکی جڤاکێ مه ، بهلێ هندهك مللهت شیاینه ب شورهشێن خو و پێشکهفتنا خو ڤی کلتوری ههتا رادهکی نههێلن ، بهلێ جڤاکهکێ وهکی مه کوردا کو بهری ههر مللهتهکێ ههست هێزا ژنێ و بها یێ وێ کریه موخابن ئهڤرو پاشڤهمایه ئهوژی ژبهر گهلهك ئهگهرا بویه و ئهگهرێ سهرهکی ژی ، داگیرکرنا وهلاتێ کوردستانێ و تهپهسهر کرن و دهربهدهرکرنا گهلێ کورد ژلایێ رژێما بهعسا فاشی ڤه ، چونکی ڤان داگیرکهران کێماسی ب ژنێ دکرو دکره خالارهش دچاڤێن خێزانێ و جڤاکێ دا ههروهسا پهروهردهکرنا وان لسهر بناغێ وێ چهندێ بویه کو ژن یا لاوازه ، درێژ ناکهم و دێ بێژم ههر چهنده کومهکا رێککهفتنا مه و پهیمان نامێن نیڤ دهولهتی دان پێدان ب وهك ههڤیا دناڤبهرا ژن و مێران دا دماف و کاران دا کریه بهلێ جڤاکێ مروڤایهتیێ یێ ل بن کارتێکرنا وان هزرێن پاشکهفتی دا و جڤاکێ مه ب پیروزی ئهو هزر پاراستینه .
ئهگهرێن ڤێ چهندێ چنه ؟؟
1- هندهك ژوان کهسان کو لژێر کارتێکرنا هزر و بیر و نهریتێت جڤاکێ باب سالاریێ دژین هیجهتا ژبو جڤاکێ نێر دبینن و خهلکێ وهسا تێدگههێن کو ژن بخو حهز ژ سیاسهتێ ناکهت یان کارێ سیاسی کارێ زهلامایه و شیانێن دهرونی یێن ژنێ یێن نازكن و دگهل ڤی کاری ناگونجن ، ههلبهت ئهڤ کهسێن خودانێت ڤێ بوچونێ سیاسهت ل دهف مهرهم پێ دهستههلاته و دهستههلات ژی ههروهکی ئهو هزر دکهن پێتڤیه ددهستێ زهلامی دا بیت ، ژبهر کو دسادهترین پێکهاتێ جڤاکی کو خێزانه ههر زهلام خودان دهستههلاته ڤێجا تشتهکێ ئاسایی یه کو وهلاتی دا ههر ئهو خودان دهستههلات بیت .
2- بلند بونا رێژا نهخویندهواریێ درێزێن ژنادا ، ژبهر کو کارێ سیاسی و پشکداری کرن ددهستههلاتێ دا پێتڤی ب هندهك شیانێن تایبهت و بسپوریێ ههیه کو پێتڤیه ژن د چارچوڤێ یاسایێن گشتی و مل ملانێ دا ژبو چڤاکی بسهلمینیت ، و خویندهواری ژێدهرێ سهرهکی یه ژبو گههشتنێ ژبو ڤی بسپوریێ ، ههلبهت نوکه رێژا نهخویندهواریێ ب رادهکێ باش د چڤاکێ مه داکێم بویه ، ژبهر کو بهردهوام خولێن نههێلانا نهخویندهواریێ ژلایێ رێکخراوێن جهماوهری و جڤاکێ مهدهنی ڤه دهێنه ڤهکرن ، دیسا دهلیڤهکا باش بو کچا هاتیه رهخساندن کو بگههنه ئاستێ خواندنا کولیژێ و دیسا ماستهرێ و دکتورایێ ، بهلێ ل سهر ڤێ ههمیێ را ههتا نوکه ژنێ پلهکا وهسا ب دهستخوڤه نهئینایه کو بشێت وهك پێتڤی پشکداریێ درێڤهبرنا دهستههلاتێ دا بکهت ئهگهر کارێ سیاسی کر بیت ژی چهند ژنهکن ب تبلێن دهستا دهێنه ههژمارتن ، شانازیێ دکهین کو 3 ههتا 4 ژن بوینه وهزیر و وهکیل وهزیر بهلێ هێشتا کێمن و چ رێژه نینه ...!!
3- دوهلاتێن پاشکهفتی دا ژبهر رهوشا نهئاسایی و سیاسهتا توندرهو و حوکمێ دکتاتوریهتێ و ههبوونا سزایێ کوشتنا و ژناڤبرنا وان کهسان کو بیر و بوچونێن جودا دگهل حکومهتێ وهلاتێ خودا ههبن ڤێ چهندێ وهکریه کو خهباتا سیاسی ب تنێ بو زهلامی بیت ب تایبهتی هندهك رهوشتێت جڤاکی کو سنورهکێ تهنگ بو رامانا شهرهفێ ددانێن و ژن نهشیایه پشکداریێ دخهباتا سیاسی دا بکهت ژبهرکو پشکهکا زورا ژنێن خهبات کهر دزیندانێن رژێما دیکتاتوری دا توشی ئهشکهنجهدان و دهست درێژیا سکسی دبون ئهڤێ چهندێ ژی گرێیهکا دهروونی بو ژنێ جێکر بهلێ ئهڤا مه گوتی وێ چهندێ ناگههینیت کو ژنێ پشکداری دخهباتێ دا نهکریه بهلکو ژنا کورد ب رهنگێن جورا و جور پشکداری دچالاکی و بزاڤا سیاسی دا کریه و توشی گرتن و ئهشکهنجهدانێ بویه و باجا پشکداری کرنا سیاسیا ههڤژین و برای و بابێن خوژی دایه ، بهلێ پاشکویهتیا ژنێ بو زهلامی دجڤاکێن باب سالاری دا ژ ئهگهرێ نهبونا سهربهخویا ئابوری و دویر بونا ژنێ کارێ بهرههمدار کو بهرامبهری ڤی کاری دا هاتیهکێ ئابوری ب دهستخوڤه بینیت ئهگهرهکێ سهرهکی بویه ژبو دویرکهڤتنا ژنێ ژکارێ سیاسی ، بهحسکرنا مه ژبو وان خالا کو ئهگهرێن ژبو لاوازبونا رولێ ژنێ داکارێ سیاسی دا یان پشت گوه هاڤێتنا ڤی رولی ژلایێ زهلامی ڤه یان بن برکرنا شیانێن ژنێ وێ چهندێ بومه دیار دکهت کو ئهو جوداهیێن ددهرحهقی ژنادا دبوارێ سیاسی دا ههین ناهێته جوداکرن ژبوارێن خواندنێ و کاروبارێن دی یێن ژیانا جڤاکی .... !
چ بهێتهکرن ژبو ب هێزکرنا پشکداری کرنا ژنێ دکارێ سیاسی دا ، پێتڤیه سهرکردایهتی و کادرێن حزبیێن سیاسی ل کوردستانێ ژ ئهگهرێن ڤێ جهندێ بگهرن و نهخشهکێ وهسا دارێژن ب تایبهتی حزبێن علمانی کو پشێن گوهرینێن پێش چاڤ و کاریگهر دڤی بواری دا جێ بهجێ بکهن و ژبو ڤێ مهرهمێ ژی پێتڤیه ههمی حزب دههڤکاربن و ڤان خالا ل پێش چاڤ وهربگرین .
1- دیراسهت کرنا میکانزما کارێ حزبی و دهست نیشان کرنا وان خالێن کو جوداکاریێ دناڤبهرا ژنێ و مێری دا دکارێ حزبی دا پهیدابکهن .
2- ب کارئینانا میکانزمهکا نوی درێکخستنا حزبێ دا کو کارێ حزبی یێ ژنێ ب ساناهی تر لێ بکهن و رێکێ بو خوش کهن .
3- ڤهکرنا خولێن حزبی بو ژنا ژبو پێگههاندنا کادرێن ژن دههمی بوارهکی دا ، و دابهشکرنا ئهرکێن حزبی ل دویف رهگهزی نهبیت .
4- پهروهردهکرنا کادرێن ژن ژبو کارێ سهرکردایهتیێئهوژی ب رێکا دانانا رێژهکا دیارکری بو ژنا دئاستێ سهرکردایهتیێ دا بو کومیتا ناڤێن ، مهکتهبایهتی بهلێ ژبیر نهکهین پێنگاڤا ئێکێ پێتڤیه ههر ژن بهاڤێژیت و جورعهتێ ئهو بدهته خو .... | 