X
تبلیغات
رجب حاجی ئاکره یی - عه‌ره‌ب و ترس له‌ده‌وڵه‌ت كوردى به زمانی شیرینی فه یلی سایتی رجب حاجی

رجب حاجی ئاکره یی

ره نگاو ره نگ

.وه‌ داوڕیان له‌و تاریخه‌ ك كه‌فیگه‌ سه‌ده‌ى بیسه‌وه‌ ، دوینیم ئیسه‌ له‌هه‌ر وه‌ختى زیاتر عه‌ره‌ب له‌خه‌و دامه‌زرانن ده‌وڵه‌ت كوردى ترسیه‌یگ.

له‌ناو جه‌هان عه‌ره‌بییش عراق و سوریا له‌گشت وڵاته‌یل تر عه‌ره‌ب زیاتر ترس له‌ده‌وڵه‌ت كوردى دیرن ، ئه‌ویش هووكار خوه‌ى دیریگ  جویر كیشه‌ى (جیۆپۆله‌تیك) .

وه‌ل فراوانبوین ناكوكیه‌یل ناونى توركیاو ئسرائیل ، ترس له‌ده‌وڵه‌ت كوردى تا تیه‌یگ  زیاتره‌و بووگ ، جویر عه‌ره‌ب وه‌ته‌نى (دامه‌زرانن ئسرائیلیگ  تر له‌باكوور عراق) ، ئمجا عه‌ره‌ب وه‌جووریگ  له‌ده‌وڵه‌ت كوردى ترسیه‌یگ  ته‌نانه‌ت ئاماده‌ نین دگان وه‌هه‌رێم كوردستانا بنه‌ن و جویر ئداره‌یگ  كوردى ك ده‌ستوور هه‌میشه‌یى عراق دگان وه‌پیا ناگه‌و ئه‌ویش له‌یوا كردگه‌ زوورم عه‌ره‌ب وه‌رانوه‌ر وه‌په‌یوه‌ندیه‌یل سیاسى و دبلۆماسى هه‌رێم كوردستان وه‌ل وڵاته‌یل ده‌وروه‌ر و جه‌هانا گومان داشتوون و جویر هه‌وڵیگ  ئه‌را دامه‌زرانن ده‌وڵه‌تیگ  كوردى ته‌ماشاى بكه‌ن

له‌شوون سه‌ردانه‌گه‌ى سه‌رۆك هه‌رێم كوردستان ئه‌را قه‌یریگ  له‌وڵاته‌یل عه‌ره‌بى و تاوتویكردن چه‌ن مه‌یدانیگ  شماره‌یگ  له‌رووشنهویره‌یل عه‌ره‌ب وه‌پیان خوه‌ش نه‌وى ك وڵاته‌یلیان وه‌ل هه‌رێم كوردستانا په‌یوه‌ندى ئابوورى داشتووگ . ترس له‌دروسبوین ده‌وڵه‌ت كوردى ترس كویه‌نه‌یگه‌و تاریخیگ  دیریگ  له‌لاى عه‌ره‌ب و وڵاته‌یل هاوساى كورد . سه‌رۆك هه‌رێم له‌سه‌ردانه‌گه‌ى ئه‌را مسر له‌ڕى یه‌كیگ  له‌ كه‌ناڵه‌یل ته‌له‌فزیۆنه‌وه‌ وتیا : وجوود ده‌وڵه‌تیگ  هه‌ق ڕه‌واى كورده‌ ، وه‌لى ترس عه‌ره‌ب له‌ده‌وڵه‌تیگ  كوردى له‌یوا كرد كه‌مترین وڵاته‌یل عه‌ره‌بى قونسڵخانه‌ى خوه‌یان له‌هه‌رێم كوردستان واز بكه‌ن ، یا له‌ناو ئه‌و هه‌مگه‌ كومپانیایه‌یل بازرگانیه‌ له‌هه‌رێم كوردستان كه‌مترین كومپانیاى عه‌ره‌بى هه‌ن .

ترس عه‌ره‌ب له‌ده‌وڵه‌تیگ  كوردى ك قاپى مقه‌یه‌تیكردن نیشتمان عه‌ره‌ب له‌خوه‌رهه‌ڵاته‌وه‌ بشكنیگ  ، له‌یوا كردگه‌ عه‌ره‌ب هه‌زاران تومه‌ت و ناونیتگ  ئه‌ڵڵاجه‌وى بوڕنه‌ باڵاى كورد ، له‌وانه‌یش وه‌ كراگیریاگ بیگانه‌و لانه‌ى سیخوڕ یا جاسووسه‌یل موسادو ......هتد . دى نیه‌زانیم عه‌ره‌ب له‌وه‌رچه‌ ئه‌را هه‌ق فلستینیه‌یل وه‌گشت جووریگ  لاڵكیه‌نه‌وه‌ ، وه‌لى له‌وه‌رانوه‌ر هه‌قه‌یل كورد چه‌ویان برایى نیه‌وینیگ  . قه‌رزاوى ك له‌جه‌هان ئسلامى عه‌ره‌بى پایه‌ى دینى دیریگ  ، وه‌ى دویاخره‌ له‌توركیا وتیاگ : ئه‌وه‌ك پارت كارگه‌ره‌یل كوردستان ئه‌نجامى ده‌ن (كوفره‌و كرده‌وه‌ى تیرۆرسیه‌)و بایه‌سه‌ ئدانه‌ بكریه‌یگ  ، وه‌ل ئه‌وه‌یشا هه‌میشه‌ عه‌ره‌ب وه‌رانوه‌ر ئه‌و كاره‌ساته‌یله‌ ك هاته‌سه‌ بان كورد له‌لایه‌ن سستمه‌یل دكتاتۆرى عه‌ره‌به‌وه‌ ،بیده‌نگ  بوینه‌ ، وه‌لى بویچگترین وه‌رگرى یادفاعكردن ك كورد له‌خوه‌ى كردویگه‌ى وه‌كار تیرۆرستى ده‌نه‌ى قه‌ڵه‌م یا ناویگ  تر له‌لى نه‌ن و هویچ وه‌ختیگ  وه‌ وژدانه‌وه‌ باس ئه‌و كار تاریخیه‌ نیه‌كه‌ن ك (سه‌ڵاحه‌دین ئه‌یوبى) كوردى ئه‌را عه‌ره‌ب كردسه‌ى ك تا دونیا دونیاس وه‌گشت عه‌ره‌به‌وه‌ نیه‌تویه‌نن جاریگ  تر قودس قورتار بكه‌ن مه‌گه‌ر خودا خوه‌ى . به‌ڵكوو ئه‌و خه‌ویانه‌ مه‌حاڵه‌ بایگه‌ دى جویر ئه‌وه‌ك ئه‌وان خوازیار ئه‌وه‌نه‌ خه‌وه‌یل كورد نایگه‌ دى ، دى وه‌و جووره‌ دوینیم ك عه‌ره‌ب ترس ئه‌ڵڵاجه‌ویگ  دیریگ  له‌ده‌وڵه‌ت كوردى.

+ نۆسراوه‌ له‌  31 Jul 2010کات ژمێر 3 AM  له‌ لایه‌ن رجب  |